Frodi Norden

Føroya Tele Samtakið (Faroese Telecom Group)

Aðalmálini hjá Føroya Tele nú og fyri á leið 110 árum síðan eru lík, men tó so ymisk. Vit knýta føroyingar saman í einfalt fjarskifti, sum helst er tað besta og fremsta av sínum slagi í Føroyum. Vit seta altíð kundan í miðdepilin í øllum okkara virksemi, og vit menna innanhýsis førleikar til at skapa einfaldar loysnir til frama fyri kundanum. Í meira enn 110 ár hava vit tænt føroyingum, og føroyska fólkið hevur verið hjartaslátturin í fyritøkuni. Men pulsurin í dag er ein heilt annar, og tað føroyska fólkið setir heilt onnur krøv í einum heimi, sum broytist dag frá degi, og kappingin er ein natúrligur partur av gerandisdegnum. Hesi krøv gera vit okkum ómak at røkka og menna hvønn dag. Skal ein fyritøka sum okkara ganga á odda í føroyska framburðinum, krevur tað fyrst og fremst dugnalig, nærløgd og nøgd starvsfólk, ið duga at laga seg eftir einum heimi í støðugari broyting. Vit vita, at meginparturin – níggju tíggindarpartar – av einum ísfjalli er undir vatnskorpuni. Soleiðis er eisini við samskiftinum millum okkum menniskju. Tað krevur innlit, styrki og førleikar at fáa alt undir yvirflatuni at hanga saman, so tað omanfyri tykist greitt og sjálvsagt.